Муарем Муарем, поранешен фудбалер и доскорашен тренер на Гостивар, се приклучи на стручниот штаб на Шкупи, каде ќе ја извршува функцијата помошник тренер на актуелниот шеф на стручниот штаб, Ердем Алпарслан.
Муарем, кој настапуваше за Шкупи како фудбалер во 2018 година, го имаше последниот ангажман во Гостивар, каде како главен тренер оствари импресивен резултат, без пораз во девет одиграни натпревари. Сепак, по ремито со Беса во ПМФЛ, тој беше сменет од позицијата прв тренер.
Покрај Муарем, дел од стручниот штаб на Шкупи се и Минас Османи, Ферид Весели и Емре Инан.
Шкупи, есенскиот дел во Првата лига го заврши на 6. место со 22 бодови, а пролетниот дел го отвара против Работнички на домашен терен.
