Сосема очекувано доаѓаат промени во Осогово после лошата есенска полусезона во Втората лига, во која Осогово успеа да триумфира само двапати, двапати ремизираше, а дури 11 пати беше поразен и со тоа собра само осум бодови за да се наоѓа во бараж зоната за опстанок.
Претседателот на клубот, Перо Георгиевски, си поднесе неотповиклива оставка, а за нов претседател е избран искусниот стратег Крсте Крстев, кој пред себе ќе има неверојатен предизвик, а тоа секако ќе биде опстанокот во Втората лига и тоа на директен начин.
Крстев веќе денес ќе има состанок со неговите соработници и фудбалерите со цел да се разговара за следните чекори на клубот. Повеќе од јасно е дека клубот ќе треба да ангажира и квалитетни засилувања, ќе треба да се направи ремонт и во тимот со цел Осогово уште од првото пролетно коло да започне со собирање на бодови бидејќи истите се повеќе од потребни во трката за излез од опасната зона и премин кон средишниот дел или во зоната која гарантиран директен опстанок во Втората лига.
Првото пролетно коло за Осогово ќе биде повеќе од важно бидејќи ќе гостува во Неготино кај тимот на Вардар, во првиот меч Осогово загуби од Вардар Неготино во Кочани, па сега сигурно е дека ќе сака триумф, а кој триумф за Осогово може да значи на крајот од сезоната и опстанок, бидејќи ќе биде против главен конкурент за директен опстанок.
Вардар Неготино е на 13. место на табелата со 14 бодови, а пак Осогово е на 14. место со осум бодови, токму овие три бодови ќе биде важни и за двете екипи.
Секако дека пред Крстев ќе биде период да го консолидира кочанскиот второлигаш, покрај промени во управата, играчкиот кадар, ќе треба и многу други работи да се поправаат, да се подобрат условите за тренинг и игра и со тоа Осогово да ја оствари својата цел и во мај месец како и минатата година да го потврди опстанокот во Втората лига, бидејќи повеќе од јасно е дека Кочани тоа и го заслужува во најмала рака да следи второлигашки фудбал.
Од денес започнува ново поглавје во Осогово, а поддршката од сите страни ќе биде добредојдена за „жетварите“.
