ГРК Охрид ќе има двојна можност пред домашната публика да го продолжи патот кон одбрана на европската круна. Двата натпревари од третото коло во ЕХФ Европскиот Куп против литванскиот Драгунас Клаипеда ќе се одиграат во Охрид, на 21 и 22 ноември, со почеток во 18:00 часот.
Наместо гостување во Литванија и потоа реванш во Македонија, „гладијаторите“ ќе ги одиграат двата дуела на домашен терен. Тоа им дава можност пред своите навивачи да ја завршат работата во оваа рунда и да направат нов чекор кон осминафиналето на натпреварувањето.
Драгунас Клаипеда е следниот предизвик за актуелниот освојувач на трофејот, откако литванскиот тим во претходната рунда го елиминираше чешкиот Робе Жубри со две победи. Сега го очекува двомеч во Охрид против тимот на Борис Ројевиќ, кој ќе сака да ја искористи домашната предност и да продолжи со успешните европски настапи.
Двата натпревари ќе се играат во „Билјанини Извори“ на 21 и 22 ноември, со почеток во 18:00 часот. Охрид ќе има две последователни вечери за европски ракомет, а поддршката од трибините може да биде важен фактор во обидот „гладијаторите“ да обезбедат место во следната фаза.
