Мартин Томовски има одличен почеток на сезоната во Бундес лигата и по првите три кола се наоѓа веднаш зад лидерот според бројот на интервенции.
Македонскиот репрезентативен голман досега запиша 34 одбрани, со што е втор на листата. Пред него е само Давид Шпет од Рајн Некар Левен, кој има 35 интервенции.
Томовски уште на премиерата против Вецлар покажа дека ќе биде сериозен фактор, бранејќи 15 удари. Во следното коло против Кил додаде уште 12 одбрани, додека на последниот натпревар, во поразот на Битигхајм од Лемго (36-29), имаше седум успешни интервенции.
Со вакви бројки, македонскиот чувар на мрежата се најде пред голем број звучни имиња од германскиот ракомет, меѓу кои Волф, Буриќ, Гаде, Ебнер, Мелер, Раверсберген и Де Варгас.
Само една одбрана го дели Томовски од врвот, па македонскиот голман уште на стартот од сезоната се позиционираше во самиот врв на една од најсилните лиги во Европа.
