Македонскиот стратег Ѓорѓи Мојсов има нов тренерски предизвик надвор од македонските граници, откако 41-годишниот стручњак постигна договор со српскиот прволигаш Земун, пренесуваат српските медиуми.
Мојсов на клупата на клубот од Горња Варош доаѓа на местото на Милан Куљиќ, кој си замина по лошиот старт на сезоната. Земун по осум одиграни кола се наоѓа на последното место со само еден освоен бод, а досегашните резултати се проследени и со гол-разлика од 3:16.
Пред македонскиот тренер е исклучително тежок предизвик – да ја стабилизира екипата и да започне со освојување бодови во борбата за опстанок во српската елита.
За Мојсов ова ќе биде прв ангажман во странство во тренерската кариера.
Најголемиот дел од досегашниот тренерски пат го мина во Тиквеш. Во кавадаречкиот клуб пристигна во јули 2021 година како дел од стручниот штаб, а во септември 2022 година ја презеде функцијата прв тренер.
На клупата на Тиквеш остана до октомври минатата година, период во кој екипата ја предводеше на 104 официјални натпревари.
Сега Мојсов го очекува ново поглавје во кариерата и прв предизвик надвор од Македонија. Почетокот нема да биде лесен, но задачата е јасна – да го разбуди Земун и да го врати тимот во борбата за опстанок.
