Падна првата тренерска оставка во Втората македонска фудбалска лига оваа сезона, откако Иван Варадиновски одлучи да се повлече од функцијата шеф на стручниот штаб на Новаци, Спортска Мрежа ексклузивно најави пред два дена на нашиот YouTube канал, каде нашите мембрси имаа ексклузивна можност први да дознаат.
Штипскиот стратег ја презеде одговорноста по незадоволителниот старт на сезоната, во кој Новаци по четири одиграни кола успеа да освои само еден бод. Тимот претрпе три порази, на гостувањето кај Охрид, на домашен терен против Беласица и на гостувањето кај Камјани, додека единствениот позитивен резултат го оствари во Кочани, каде што ремизираше со Осогово.
Со биланс од еден освоен бод од можни 12, Варадиновски одлучи да поднесе оставка и да го напушти кормилото на Новаци.
За Спортска Мрежа, самиот Варадиновски потврди дека оставката е поднесена.
“Понекогаш, едноставно, нештата не се одвиваат онака како што посакуваме. По извесен период поминат во клубот, донесов одлука да поднесам оставка. Сакам искрено да ѝ се заблагодарам на управата за укажаната доверба и за целата поддршка во периодот што го поминавме заедно. Клубот функционира одлично и навистина ми беше чест да соработувам со луѓе кои професионално и посветено работат за клубот. На клубот, играчите, управата и навивачите им посакувам многу успех, среќа и убави моменти во иднина. Благодарам за сè и со почит ви посакувам само најдобро”, вели Варадиновски за Спортска Мрежа.
Варадиновски зад себе има богато тренерско искуство во македонскиот фудбал. Во кариерата работеше во Кожуф, Каменица Саса и Кит Го од Пехчево, а најголемиот успех го постигна со Детонит Плачковица, со кој стигна до бараж за пласман во Првата македонска фудбалска лига против Вардар од Скопје.
За Новаци сега следува период на промени и потрага по ново тренерско решение, додека тимот ќе мора што поскоро да ја прекине негативната серија и да започне со освојување бодови во второлигашката конкуренција.
На денешниот Куп натпревар, Новаци против Охрид ќе го води асистентот на Варадиновски.
