Денес на програмата се седум натпревари од Купот на Македонија, каде што ќе има неколку неизвесни дуели за пласман во осминафиналето, но и натпревари каде ќе има изразити фаворити и реприза на натпревари од првото коло на Втората лига.
Прволигашот Башкими како фаворит ќе игра против третолигашот БВК Коњаре, ова ќе биде дерби на две екипи кои пред неколку сезони беа дел од Трета лига – Север кога водеа борба за првото место и пласман во Втора лига.
Детонит Плачковица ќе го пречека прволигашот Шкендија Арачиново на Градскиот стадион во Радовиш, а пак Брегалница против Тетекс ќе игра како формален гостин на Градскиот стадион во Штип.
Ланскиот второлигаш Каменица Саса ќе игра против екс прволигашот Шкупи на домашен терен, Кожуф ќе биде домаќин на прволигашот Скопје.
Реприза на мечот од првото коло на ВМФЛ ќе има во Кочани меѓу Осогово и Беласица, откако овие две екипи веќе играа во Струмица каде Беласица беше подобра со минимални 1:0. Реприза ќе има и на мечот меѓу Новаци и Охрид, но сега „рибарите“ ќе бидат гости, а на соочување од првото коло на ВМФЛ екипата на Охрид со 2:1 беше подобра.
Претходно, пласман во следната фаза обезбедија Пелистер, Брера Струмица, Македонија ЃП, Вардар и Струга Трим Лум.
