Новиот прволигаш Пелистер влезе во победничка серија со три победи во низа со што битолскиот тим собра девет бодови и котира висока на табелата во Првата женска фудбалска лига по четири кола.
По високиот пораз во Струмица од Тиверија Брера, се случи вистинска пресвртница во тимот од Битола, откако Пелистер влезе во победничка серија со три победи во низа.
Искусната Мила Талевска, која го носи дресот на Пелистер, во изјава за Спортска Мрежа, истакна дека трите победи во низа даваат дополнителен мотив и самодоверба, но притоа знаат дека сезоната е долга и мора да бидат максимално фокусирани на сите следните предизвици.
„Атмосферата во тимот е одлична. Трите победи во низа ни дадоа дополнителен мотив и самодоверба, но знаеме дека сезоната е долга и дека мораме да продолжиме да работиме и да бидеме максимално фокусирани. Најважно е што сме сплотени како тим и се надевам дека оваа позитивна серија ќе продолжи“, вели Талевска во изјава за Спортска Мрежа.
Талевска изјави дека како тим сакаат да бидат стабилни и да се задржат на средината на табелата.
„Очекувам позитивна сезона и добри резултати до самиот крај. Како тим сакаме да бидеме стабилни и да се задржиме во средината на табелата, а секако, секој добар резултат плус ќе биде добредојден. Најважно за мене е да останеме здрави, да нема повреди и сите заедно да ја завршиме сезоната во добра атмосфера и со позитивни резултати“, дополни искусната фудбалерка на Пелистер.
Во следното коло Пелистер ќе гостува во Струга кај Ас Јунајтед.
