Фудбалскиот клуб Готен од Подареш ги започна подготовките за новата сезона, во која по неколку години пауза повторно ќе биде дел од фудбалската карта на Македонија. Тимот од радовишкото село ќе се натпреварува во Општинската фудбалска лига Струмица во сезоната 2026/27, со амбиции за висок пласман.
На стартот на подготовките во клубот владее голем ентузијазам, а посебно внимание привлекува улогата на Иван Конзулов, кој во новата сезона ќе има двојна функција – ќе биде тренер, но истовремено и активен играч на Готен.
По долгогодишна пауза, фудбалот повторно се враќа на теренот во поранешната општина Подареш. Претходно имаше низа активности за ставање во функција на спортскиот објект, при што се работеше на санација на оградата, расчистување и уредување на теренот, како и подготовка на соблекувалните и просторот околу игралиштето.
Готен во изминатиот период успеа да врати и неколку фудбалери, а според информациите на Спортска Мрежа, во Подареш постепено се формира конкурентен ростер. Амбициите се јасни – реактивираниот клуб да не биде само учесник во ОФЛ Струмица, туку сериозно да конкурира за висок пласман.
Општинската фудбалска лига Струмица и оваа сезона ќе обедини екипи од повеќе општини од регионот – Струмица, Радовиш, Василево, Босилово и Ново Село, а враќањето на Готен дополнително го збогатува нисколигашкиот фудбал во југоисточниот дел од земјата.
Приказната од Подареш допрва ќе добива продолжение. Спортска Мрежа наскоро ќе реализира спортска емисија директно од Подареш, во која ќе ја доловиме атмосферата околу реактивирањето на клубот и ќе ги претставиме ростерот, плановите и целите на Готен за новата сезона.
