Љуботен забележа убедлива победа над Кочани откако на домашен терен го декласираше со неверојатни 8:2 во меч од 3. коло на Првата женска фудбалска лига.
Резултатот и беше за очекување, со оглед на големиот квалитет меѓу двете екипи, па ова може да се категоризира како тренинг натпревар за Љуботен за продолжението од шампионатот.
Резултатот го отвори 28-годишната Бразилка, Лоурдес Роберта Оливиера Де Насцименто по три минути игри, а веќе во 7. минута Ива Салтирова постигна гол за 1:1. Но, тој примен гол го „вознемири“ домашниот тим, па преку хет-трикот на Улза Максути и голот на Калина Попески во 38. минута резултатот беше 5:1.
Во вториот дел Попески постигна уште еден гол, а погодија и Михаела Додеска и Ива Јованоска, а пак за Кочани гол постигна и Катерина Милеска.
Шампионот Скопје однесе голема победа над вицешампионот Тиверија Брера со високи 0:3 со што тимот од Пржино веднаш се врати на победничките патеки, а пак тимот од Струмица го доживеа првиот сезонски пораз.
Рабија Дервиши го отвори резултатот во 18. минута за водство на гостинот од 0:1 на полувреме. На стартот од вториот дел Јована Каралиоска погоди за 0:2 и сигурна предност
Тиверија Брера се обидуваше да материјализира некоја шанса за гол, но Блехана Алиеска во 72. минута ги постави конечните 0:3.
Како што претходно информираше Спортска Мрежа, Речица загуби од Каменица Саса со 0:2, Пелистер го доби Вардар со 3:4, додека пак Ас Јунајтед со 1:4 го доби Истатов во гости.
