Актуелниот шампион Вардар победнички ја отвори новата сезона во Супер машката лига. „Црвено-црните“ на домашен терен славеа над Еурофарм Пелистер 2 со 31-19 и успешно ја започнаа одбраната на шампионската титула.
Битолчани имаа добар старт и во првите минути му парираа на фаворитот. По осум минути игра беше 4-4, а гостите долго време не му дозволуваа на Вардар да создаде посериозна разлика.
Домашниот состав постепено ја подигна одбраната, а тоа веднаш донесе резултат. Вардар направи серија за водство од 8-4, но Пелистер 2 возврати и во 16. минута се приближи на 9-7.
Потоа следуваше клучниот период од првото полувреме. Вардар повторно ја презеде контролата, постигна четири гола во низа и поведе со 13-7. Гостите успеаја да намалат на 14-9, но до паузата целосно застанаа во нападот. Скопјани го искористија тоа и со нова серија од 4-0 заминаа на одмор со убедливи 18-9.
На почетокот на вториот дел Вардар експресно стигна до двоцифрена предност, а со голот за 23-10 ја имаше и највисоката разлика на мечот. Пелистер 2 не се предаде и возврати со серија од 4-0 за 23-14, по што Иван Чупиќ реагираше со тајмаут.
До финишот, Вардар рутински ја одржуваше предноста, а во последните минути повторно ја зголеми разликата и на крајот стигна до убедлив триумф од 31-19.
Во победничкиот состав Матео Фадуил беше најефикасен со шест погодоци, додека Урош Митровиќ и Јуниор Тузолана постигнаа по пет. Кај Еурофарм Пелистер 2, Кристијан Симоновски беше најпрецизен со четири гола.
За Вардар на овој натпревар дебитираше и голманот Милан Бомаштар, кој во второто полувреме запиша пет интервенции за 22 минути на теренот.
Чупиќ поради ограничувањето на бројот на странци, но и со цел да ги одмори дел од играчите пред патувањето во Германија, не можеше да смета на Кеита, Валах, Воркапиќ, Лазаревски и Педро.
