РК Алкалоид продолжи со победничките настапи во Регионалната лига, откако повторно го надигра Ловќен. Македонскиот тим славеше во Цетиње со 40-29 и вторпат во краток период излезе како победник против црногорскиот состав.
По неизвесните 30 минути, во кои резултатот беше израмнет 18-18, Алкалоид направи голем исчекор во продолжението. Избраниците на Кирил Лазаров го подигнаа темпото, ја презедоа контролата и постепено ја изградија разликата која во финишот достигна двоцифрена.
И вториот меч со Ловќен беше особено ефикасен за Алкалоид – скопскиот состав во двете средби му постигна дури 95 гола на црногорскиот ривал.
Иван Џонов беше најпрецизен кај победникот со осум погодоци, додека Марко Митев постигна шест. Кај Ловќен, Мрваљевиќ заврши со седум гола.
Следен противник за Алкалоид во Регионалната лига ќе биде Дубочица, додека Ловќен ќе се сретне со Партизан.
