Македонскиот ракомет во среда ќе добие ново големо дерби, откако Вардар и Охрид ќе се соочат во битката за Супер купот. Натпреварот во Гевгелија ќе биде прва официјална пресметка меѓу двата тима во новата сезона и можност за освојување на првиот трофеј.
Охрид во подготвителниот период двапати излезе како победник против „црвено-црните“, триумфирајќи во финалните натпревари на турнирите во Струга и на „Крсте Андоновски“ во Охрид. Сепак, Адама Кеита е свесен дека Супер купот носи поинаква тежина и дека за успех ќе биде потребно максимално издание.
„Во среда нè очекува интензивен и тежок натпревар. Ќе мора да внимаваме и да имаме што помалку грешки во 60 минути ако сакаме резултат во наша корист“- изјави Кеита.
Левото крило на Охрид и неговите соиграчи ќе имаат можност да ја продолжат успешната серија против Вардар, но овојпат во натпревар во кој влогот е трофејот од Супер купот.
Дуелот ќе се одигра во среда од 19:00 часот во салата „26 Април“ во Гевгелија, каде што ќе биде познат новиот освојувач на Супер купот на Македонија.
