РК Еурофарм Пелистер ја заокружи првата мини-серија во Регионалната лига со совршен учинок. Битолчани вечерва во „Боро Чурлевски“ го совладаа Дубочица со убедливи 38-24 и стигнаа до трета победа од исто толку натпревари.
Дубочица подобро го отвори мечот и поведе со 4-1, но домаќинот брзо се стабилизираше. Пресвртот дојде во финишот на првиот дел, кога Пелистер со серија од пет гола стигна до 13-10, а на одмор замина со 18-13.
По паузата, избраниците на Лино Червар целосно ја презедоа контролата. Цврстата одбрана и ефикасниот напад му овозможија на македонскиот вицепрвак да ја зголеми разликата, а со серијата 4-0 во финишот Пелистер стигна до убедливи 33-21.
До крајот битолчани рутински ја одржаа предноста и запишаа уште еден сигурен триумф. Петар Атанасијевиќ беше прв стрелец со 11 гола, додека капитенот Филип Кузмановски постигна осум. Кај гостите Ристовиќ беше најефикасен со пет погодоци.
По Партизан, Ловќен и Дубочица, Пелистер ја заврши оваа серија со максимални три победи и во одлично расположение продолжува кон следните предизвици.
