Охрид запиша убедлива победа во третото коло од Втората македонска фудбалска лига, откако на домашен терен со високи 5-1 го совлада Кожуф. Гостите од Гевгелија одлично го отворија натпреварот и преку Христијан Бејков уште во шестата минута стигнаа до предност, но радоста кратко траеше.
Охриѓани потоа целосно го презедоа натпреварот и направија целосен пресврт, а вистински херој на убедливиот триумф беше Антонио Каланоски. Напаѓачот постигна дури четири погодоци и го предводеше својот тим до убедливи 5-1, додека во листата на стрелците се запиша и Марко Николовски.
До победа во третото коло стигна и Тетекс, кој на гостински терен со 1-3 го совлада Шкупи.
За „тетовските штофари“ ова е значаен триумф против ланскиот прволигаш. Алии Рамин беше двоен стрелец, а гол постигна и Никола Ристевски. За Шкупи единствен стрелец беше Нухија Нејази.
Колото се затвара вечерва во Струмица, каде што под рефлектори ќе се соочат Беласица и Детонит Плачковица.
