Струга Трим Лум по првите четири кола има освоено седум бода и моментално се наоѓа на четвртата позиција на табелата. Денеска стружани на домашен терен ја пречекуваат Брегалница, во натпревар во кој ќе се обидат да се вратат на победнички патеки.
Домашниот терен досега се покажа како голема предност за Струга Трим Лум. На првите два натпревари пред своите навивачи тимот забележа две победи, и тоа без да прими гол.
Токму оваа серија е мотив повеќе за стружани, кои се надеваат дека и по денешниот дуел ќе ја задржат максималната ефикасност на домашен терен и ќе стигнат до нови три бода.
„Ова е многу важен натпревар во кој ќе бараме начин да се вратиме на победите. Се надевам дека со голем ангажман и сериозност од целата екипа, на крајот ќе успееме да стигнеме до триумф. Сметам дека сме подобри од противникот, но тоа ќе треба да го докажеме и на теренот“, изјави Ландрит Рама.
Дефанзивецот летово се приклучи на Струга Трим Лум, откако пристигна од косовскиот клуб Лапи, кој настапува во тамошната Суперлига.
Натпреварот меѓу Струга Трим Лум и Брегалница ќе се одигра денеска на Градскиот стадион во Струга, со почеток од 17:00 часот.
