Ракометниот клуб Текстилец УГД влегува во завршната фаза од подготовките за новата сезона во Првата ракометна лига на Македонија. Штипскиот состав веќе е во полн тренажен процес, а до почетокот на првенството останува да се одиграат уште неколку пријателски натпревари.
Во клубот се задоволни од досегашниот тек на подготовките, а тренерот Бобан Попов го истакнува добриот интензитет на тренинзите. Управата успеа во најголем дел да го задржи костурот од минатата сезона, што претставува важен сегмент во градењето на тимот.
Во составот остануваат капитенот Филип Џинес, како и Александар Јовановски, Драган Сенев, Филип Савев, Дарио Јорданов, Роберт Миланов, Лазар Стојанов, Кристијан Атанасов, Милисав Петров и Марјан Савев.
Паралелно со тоа, Текстилец УГД продолжува да се потпира и на сопствениот младински погон. Во сениорскиот состав се приклучуваат Кристијан Станчен, Христијан Властов, Христијан Коцев, Петар Зафиров, Никола Миланов, Андреј Зафиров, Андон Арсов, Христијан Харизанов и Марко Димов.
За дополнително засилување на конкуренцијата во тимот ангажирани се и Илија Табаков, Никола Таневски, Кире Миленков и Стефан Стојанов, а клубот е во преговори со уште двајца ракометари.
Од штипскиот клуб заминаа Јован Атанасовски и Борче Боболков, на кои Текстилец УГД им посакува здравје, среќа и успех во продолжението на нивните кариери.
Со комбинација од искусни ракометари, млади играчи од сопствениот погон и неколку нови засилувања, Текстилец УГД ја гради екипата за новата сезона со големи амбиции и очекувања.
Првенството во Првата ракометна лига започнува на 12/13 септември, а до тогаш штипјани ќе имаат можност дополнително да ја воиграат екипата преку неколку контролни натпревари.
Текстилец УГД е во завршна фаза од подготовките – составот е речиси комплетиран, формата се темпира, а очекувањата пред новата сезона се високи.
