Македонскиот прволигаш Арсими продолжува да го засилува составот, а клубот официјализираше две нови имиња во тимот – Маркел Гони повторно ќе го носи жолто-црниот дрес, додека Мухарем Мислими пристигнува како засилување за одбранбената линија.
Гони добро ја познава средината во Арсими, каде што настапуваше во вториот дел од минатата сезона. Шпанецот остави позитивен впечаток со своите настапи, а во 13 натпревари во ПМФЛ постигна три гола. И покрај интересот од други клубови, Гони одлучил повторно да се врати во Арсими, кој го пречека со порака дека „се враќа дома“.
Од клубот посочуваат дека неговото враќање е мотивирано од желбата повторно да биде дел од тимот и да продолжи со истата енергија и амбиција за успех.
Покрај Гони, Арсими го претстави и Мухарем Мислими, кој ќе биде ново име во дефанзивната линија. Станува збор за фудбалер со искуство во домашниот фудбал, кој во досегашната кариера го носел дресот на повеќе клубови, меѓу кои Башкими, Беса и Шкендија, како и на други екипи.
Во Арсими очекуваат Мислими со своето искуство и цврстина да донесе дополнителен квалитет во одбраната, особено во период кога тимот се обидува да ја стабилизира ситуацијата по лошиот старт на сезоната.
Арсими по првите две кола во ПМФЛ е без освоен бод. Сезоната ја отвори со убедлив пораз од 5-1 на гостувањето кај Тиквеш во Кавадарци, а во второто коло следуваше уште еден висок пораз – 4-0 против Брегалница во Штип.
Двете нови засилувања треба да му помогнат на тимот од Чегране да ја подобри играта и резултатите во продолжението од шампионатот.
