Македонската јуниорска репрезентација го заврши настапот на Европското првенство од Дивизијата „Б“ во Тулчеа со пораз од Естонија со 64:76, во последниот натпревар од групата „Е“ за пласман од 17. до 20. место.
Естонките подобро го започнаа натпреварот и по првата четвртина имаа предност од осум поени (23:15). Во вториот период нашите кошаркарки одиграа многу подобро, ја намалија негативата и на полувремето заминаа со само пет поени заостаток (35:40).
Сепак, третата четвртина се покажа како клучна за конечниот исход. Македонија постигна само осум поени, додека Естонија реализираше 18 и пред последните десет минути стигна до водство од 58:43.
Во завршниот период македонските јуниорки се обидоа да направат пресврт, но Естонија успеа да ја задржи предноста и на крајот да слави со 76:64.
Најефикасна во македонскиот состав беше Трајковска со 13 поени, четири скока и три асистенции. Колева постигна 11 поени, а имаше и осум асистенции и четири скока.
Со овој натпревар македонската јуниорска репрезентација го заврши настапот на Европското првенство од Дивизијата „Б“ во Тулчеа.
