Актуелниот шампион на Македонија, Скопје, со победа ја продолжи серијата подготвителни натпревари пред стартот на новата сезона во Првата македонска женска фудбалска лига. Тимот од скопско Пржино вчера во битолско Кравари славеше убедливо со 0-3 против повратникот во елитното друштво, Пелистер.
За двете екипи ова беше уште една квалитетна проверка во подготвителниот период, со која стручните штабови добија можност да ја проверат моменталната форма, но и да ги усовршат последните детали пред почетокот на првенствените обврски.
Стрелци за тимот на Илија Мандаров беа Панева, Крстева и Милевска. За Скопје веќе денес следува нов пријателски натпревар во Македонска Каменица против Каменица Саса.
Скопје во новата сезона ќе влезе со јасна цел – одбрана на шампионската титула, а убедливиот триумф над Пелистер е дополнителна потврда за амбициите на актуелниот првак.
Од друга страна, Пелистер по враќањето во Првата женска лига го очекува нов предизвик и настап во најсилната конкуренција.
Новата сезона во Првата македонска женска фудбалска лига започнува на 23 август, со натпреварите од воведното коло.
Скопје ќе ја започне одбраната на титулата на домашен терен против Кочани, додека Пелистер ќе има гостински старт. Битолскиот тим ќе патува во Струмица, каде што ќе се соочи со Тиверија Брера.
