Македонската одбојкарска репрезентативка Ерјона Јонузи во новата сезона ќе го носи дресот на словачкиот шампион Слован Братислава, кој официјално го потврди нејзиниот ангажман.
Јонузи, која настапува на позицијата техничар, во моментов се наоѓа на подготовки со сениорската репрезентација на Македонија за претстојните Медитерански игри во Таранто. Во изминатите две сезони успешно ги бранеше боите на Нове Место, а одличните настапи и во клубот и во националниот тим беа доволна препорака за интересот од актуелниот словачки шампион.
Двете страни потпишаа едногодишен договор, а македонската репрезентативка верува дека преселбата во Слован Братислава ќе претставува значаен чекор во нејзиниот понатамошен кариерен развој.
„Трансферот во Слован Братислава претставува голем чекор во мојата кариера и чест ми е што ќе бидам дел од еден од најреномираните клубови во Словачка. По неколкуте сезони поминати во словачкото првенство, верувам дека ова е вистинската средина за мојот понатамошен развој и напредок. Како репрезентативка на Македонија, секогаш се стремам да го дадам својот максимум и на теренот и надвор од него. Моја цел е да му помогнам на тимот да оствари значајни резултати и заедно да се бориме за највисоките позиции. Со нетрпение го очекувам почетокот на сезоната, запознавањето со новите соиграчки и можноста заедно да создадеме успешна приказна“, вели Ерјона Јонузи.
Јонузи интернационалната кариера ја гради во последните две години, додека потекнува од редовите на тетовска Шкендија, настапуваше и за Универзитет во Тетово, како и за Работнички Скопје, со кој има и шампионска титула.
