Тренерот на голмани во второлигашот Детонит Плачковица од Радовиш, Дарко Денков, се најде на радарот на германски клуб, кој покажал сериозен интерес за неговите услуги. Доколку дојде до реализација на соработката, за штипјанецот тоа би претставувало прв интернационален ангажман во неговата тренерска кариера.
Интересот од Германија претставува големо признание за досегашната работа на Денков, но и можност за отворање на ново поглавје во неговата професионална кариера. Ваквиот чекор би можел да биде силна препорака и да му отвори врати за нови меѓународни предизвици во иднина.
Сепак, конечната одлука нема да биде едноставна. Денков во моментов има активни ангажмани и е целосно посветен на спортот во Штип и Радовиш, а воедно е и семеен човек. Токму затоа, неговата одлука дали ќе ја прифати понудата од Германија ќе биде донесена по внимателно разгледување на повеќе професионални и приватни фактори.
Во изминатите години Денков изгради репутација на посветен и квалитетен тренер на голмани, препознатлив по работата со млади и перспективни чувари на мрежата. Покрај клупските обврски, тој е дел и од специјализиран голмански камп на кој учествуваат талентирани голмани од целиот Балкан, каде активно го пренесува своето знаење и искуство.
Доколку се реализира трансферот, тоа нема да биде само значаен личен успех за Дарко Денков, туку и уште една потврда дека македонските тренери со својата работа и стручност можат да го привлечат вниманието и на клубови надвор од границите на државата. Сега останува да се види дали Денков ќе се одлучи да го направи најголемиот чекор во својата досегашна тренерска кариера и да започне меѓународна приказна во германскиот фудбал.
