На новиот терен со вештачка трева во рамки на спортскиот комплекс „Истатов“ во Дојран се одигра пријателски натпревар меѓу прволигашите Истатов и Тиверија Брера каде тимот од Струмица беше подобар со резултат од 3:5.
Резултатот беше во втор план, а ова беше можност да проверат и едните и другите како им оди подигањето на формата, дали и како би требало да се корегираат во ростерот односно да се добие првата јасна слика за тимот за новата сезона која стартува на 23 август.
За Истатов двоен стрелец беше Елма Шемовиќ, а стрелец на првиот гол беше Андреа Колоска, која погоди во 3. минута од средбата за отварање на резултатот во Дојран. За тимот на Тиверија Брера двоен стрелец беше Теона Галабовска, едниот гол беше од белата точка, а по еднаш погодија Билјана Панеска, Ивана Илиева и Розита Пецева.
Воедно, овој контролен меч беше премиерен на новиот терен со вештачка трева при СЦ „Истатов“ во Дојран, со што им се нуди одлична можност за сите екипи кои би доаѓале на подготовки во Дојран, односно за одигрување на пријателски натпревари.
Инаку, ова беше прв контролен меч и за двете екипи, кои уште еднаш меѓусебно ќе се тестираат во Струмица на 9 август.
