Селекторот Жозеп Марија Берокал порача дека најважно е Македонија да ги има на располагање сите репрезентативци, за националниот тим да настапи во најсилниот можен состав.
Македонската машка сениорска кошаркарска репрезентација ги дозна своите противници во втората рунда од претквалификациите за ФИБА Евробаскет 2029. Според ждрепката одржана во Минхен, Македонија ќе биде дел од групата „Ф“, каде што ќе ги одмери силите со Австрија и Кипар.
Осврнувајќи се на исходот од ждрепката, Берокал истакна дека и двете селекции се респектабилни противници и дека Македонија ќе мора максимално подготвена да ги дочека натпреварите. Тој потенцираше дека клучно ќе биде репрезентацијата да биде комплетна и сите повикани кошаркари да бидат подготвени за настап.
„Ја започнуваме втората рунда од претквалификациите за Евробаскетот во месец август. Австрија и Кипар се добри репрезентации, доаѓаат од квалификациите за Светското првенство и ќе видиме што ќе ни донесат овие натпревари. Имаме шест недели до почетокот на подготовките, кои ќе бидат многу важни за нас, затоа што нè очекуваат тешки натпревари, а стартуваме со гостување во Австрија.“
Селекторот вели дека најголем приоритет е на располагање да ги има сите репрезентативци, за Македонија да настапи во најсилен состав.
„Најважно ми е да ги имаме сите играчи на располагање, добро да се подготвиме и се надевам дека сите ќе можат да се јават на повикот. Желбата ми е да играме во најсилниот ростер. Се надевам дека во август ќе го имаме најдобриот можен тим за дуелот со Австрија и успешно ќе ја започнеме оваа квалификациска рунда“, вели селекторот Берокал.
