Женската репрезентација на Македонија до 18 години забележа победа од 57:43 над селекцијата на Косово во контролен натпревар одигран во малата сала на СРЦ „Кале“, како дел од завршните подготовки за Европското првенство од Дивизијата Б во Тулчеа, Романија.
Македонските кошаркарки имаа подобар почеток и по водството од 7:2 ја добија првата четвртина со 18:12. Во вториот период гостинките успеаја да го свртат резултатот и на паузата заминаа со минимална предност (33:31).
Сепак, во второто полувреме избраничките на селекторот Виктор Петровски целосно го презедоа контролата. Со цврста и дисциплинирана одбрана му дозволија на Косово да постигне само 10 поени во последните две четвртини, што им донесе убедлива победа.
Најефикасна во македонскиот состав беше Ива Колева, која по враќањето од повреда постигна 19 поени. Мариновска придонесе со 9, а Пислевска натпреварот го заврши со 7 поени.
Контролниот натпревар беше искористен и за дополнително воигрување на составот, при што селекторот Петровски им даде минутажа на сите 16 кошаркарки што се дел од подготовките пред настапот на континенталниот шампионат.
