Подготовките за традиционалниот турнир „Малеш Куп Берово 2026“ се во полн ек, а организацијата веќе влегува во својата завршна фаза. На теренот кај Старата гимназија во Берово интензивно се работи на подготовка на условите за почетокот на еден од најатрактивните летни фудбалски турнири во Источна Македонија.
Турнирот ќе се одржи во периодот од 17 до 24 јули 2026 година, а и оваа година ќе донесе многу возбудувања, квалитетни натпревари и одлична спортска атмосфера.
На „Малеш Куп Берово 2026“ ќе настапат 10 екипи, поделени во две групи, кои ќе се борат за престижниот трофеј, пехарите и вредните награди. Организаторите најавуваат уште едно издание исполнето со неизвесни натпревари и вистински спортски спектакл.
Мотото на турнирот и годинава останува препознатливо: „Еден турнир. Една страст. Една Малешевија!“
Спортска Мрежа и оваа година ќе биде медиумски покровител на овој значаен спортски настан, кој веќе прерасна во традиција во Берово. Ќе има редовно известување за сите натпревари преку детални извештаи, фотографии, интервјуа, видео содржини и најнови информации.
Одбројувањето до почетокот продолжува, а љубителите на фудбалот веќе со нетрпение го очекуваат стартот на уште едно издание на „Малеш Куп“, кое и ова лето ќе го претвори Берово во центар на спортските случувања во Источна Македонија.
