Женскиот ракометен клуб Вардар ги дозна противниците за новата европска сезона, откако денеска во седиштето на Европската ракометна федерација во Виена беше одржана ждрепката за второто коло од ЕХФ Европскиот куп.
На враќањето на европската сцена, „црвено-црните“ ќе се соочат со италијанскиот претставник Бриксен Судтирол, во двомеч кој ќе одлучува за пласман во следната рунда од натпреварувањето.
Првиот натпревар е закажан за 3 или 4 октомври во Италија, додека реваншот ќе се одигра 10 или 11 октомври во Скопје. Вардар, како носител во ждрепката, ќе има можност пред својата публика да го игра решавачкиот натпревар.
Победникот од овој двомеч ќе обезбеди место во третото коло на ЕХФ Европскиот куп, каде ќе му се приклучат уште десет екипи кои се директно пласирани во оваа фаза.
Покрај Вардар, Македонија ќе има уште еден претставник во ова натпреварување. Екипата на Чаир поради својот европски коефициент е директно пласирана во третото коло, а својот противник ќе го дознае по завршувањето на втората рунда и ждрепката закажана за 13 октомври.
