ГРК Охрид останува без еден од најважните ракометари во дефанзивната линија. Шпанскиот специјалист за одбрана Ориол Реј Моралес ја заврши својата епизода во охридскиот клуб и во новата сезона ќе настапува за полскиот вицешампион Висла Плок.
Македонскиот освојувач на ЕХФ Европскиот Куп преку официјално соопштение потврди дека разделбата не била во плановите на клубот, но по барање на ракометарот била активирана излезната клаузула од договорот.
„ГРК Охрид ја информира јавноста дека Ориол Реј Моралес повеќе не е член на нашиот клуб. Иако клубот апсолутно не беше за разделба со еден од своите клучни дефанзивци пред истекот на неговиот договор, на барање на играчот беше активирана излезната клаузула, а полскиот шампион Висла Плок го откупи неговиот договор. Му благодариме на Ориол за посветеноста и придонесот во дресот на ГРК Охрид и му посакуваме успех и во понатамошната кариера“- се вели во соопштението од клубот.
Реј, во Охрид пристигна минатото лето и за само една сезона остави силен белег во тимот. Тој беше еден од носителите на одбраната и даде значаен придонес во историската сезона, во која охриѓани го освоија првиот европски трофеј – ЕХФ Европскиот Куп.
