Машката репрезентација на Македонија до 18 години го забележа и вториот пораз на контролните натпревари против соодветната селекција на Бугарија, кои викендов се одиграа во Ботевград. По поразот од 87:77 на првиот дуел, избраниците на селекторот загубија и на вториот меч, овојпат со резултат 85:75.
Македонските кошаркари одиграа добро во првото полувреме и на паузата заминаа со минимална предност од 42:41. Сепак, Бугарија беше подобар противник во продолжението, направи пресврт во третата четвртина и пред последните десет минути имаше водство од 54:49. Во завршницата домаќините ја задржаа контролата и ја зголемија предноста за конечни десет поени разлика.
Најефикасен во македонскиот состав беше Ѓорѓи Цветковски со 21 поен. Дамјан Стојановски додаде девет поени и пет скока, додека Григориј Ѓорѓевиќ натпреварот го заврши со осум поени и пет скока.
Двата контролни натпревари против Бугарија се дел од подготовките на македонската репрезентација за настапот на Европското првенство од Дивизијата „Б“, кое ќе се одржи во Хрватска.
