Ракометниот клуб Младост 1977 продолжува да ја гради својата иднина преку развојот на сопствени кадри, а најнов доказ за тоа е првиот професионален договор на 17-годишното лево крило Методи Младеновски.
Младиот ракометар е производ на школата на Младост 1977 и ги помина сите младински категории во клубот. Со својата посветеност, дисциплина и континуиран напредок заслужи да добие професионална доверба и да направи значаен чекор во својата кариера. Воедно, Младеновски е и кадетски репрезентативец на Македонија.
Со овој потег, новиот суперлигаш уште еднаш покажува дека покрај засилувањата за претстојната сезона, сериозно вложува и во развојот на младите ракометари, кои треба да бидат носители на клупската иднина.
„РК Младост 1977 продолжува да ја гради својата иднина со сопствени кадри!
Со особена гордост објавуваме дека 17-годишното лево крило Методи Младеновски го потпиша својот прв професионален договор со нашиот клуб. Методи е дете на Младост 1977, ракометар кој ги помина сите младински категории, покажувајќи посветеност, дисциплина и голем потенцијал. Денес неговата работа е наградена со првиот професионален договор, а ова е само почеток на еден нов предизвик во сино-белиот дрес. Му честитаме на Методи и му посакуваме многу здравје, успеси и незаборавни моменти во дресот на РК Младост 1977. Заедно продолжуваме да ја градиме иднината на клубот !“
Младост 1977 во изминатиот период активно го формира ростерот за новата суперлигашка сезона, а потписот на Младеновски е уште една потврда дека клубот има јасна стратегија – покрај искусните засилувања, значајно место во проектот имаат и младите домашни таленти.
