Фудбалскиот клуб Скопје ќе влезе во новата сезона со промени на тренерската позиција, откако шефот на стручниот штаб Александар Таневски и официјално се разделува со прволигашот од Автокоманда.
Таневски успешно ја исполни главната цел со „пиратите“, откако го врати клубот во Првата македонска фудбалска лига. Скопје минатата сезона ја заврши на второто место во Втората лига, а потоа преку баражот ја совлада Брера Струмица и обезбеди пласман во елитното друштво, враќајќи го клубот во Првата лига по неколкугодишно отсуство.
Заминувањето од клубот го потврди и самиот Таневски, кој преку емотивна порака се збогуваше со Скопје.
„Некои одлуки во фудбалот се најтешки токму кога има почит и заеднички успех. Не си заминувам од ФК Скопје затоа што не го сакам клубот, играчите, навивачите и луѓето од населбата. Напротив — токму поради сè што поминавме заедно, оваа одлука ми е тешка. Заедно создадовме тим, атмосфера и успех на кој сите можеме да бидеме горди. Го вративме клубот таму каде што заслужува да биде — во Првата лига. Но понекогаш, колку и да сакаш нешто, мора да прифатиш дека некои приказни треба да завршат додека сè уште има достоинство, почит и убави спомени. Ви благодарам на играчите, стручниот штаб, навивачите и сите што беа дел од оваа сезона. ФК Скопје секогаш ќе има посебно место во моето срце“, вели Таневски.
Скопје веќе ги започна подготовките за новата сезона, но по заминувањето на Таневски раководството ќе треба да избере нов шеф на стручниот штаб кој ќе го предводи тимот во претстојното првенство. Новата сезона во Првата македонска фудбалска лига започнува на 25 јули, а клубот од Автокоманда наскоро ќе треба да го комплетира стручниот штаб пред стартот на шампионатот.
