Машката младинска репрезентација на Македонија успешно го започна настапот на Европското првенство од Дивизијата „Б“ во Братислава, откако во првото коло ја совлада селекцијата на домаќинот Словачка со 71:63.
Избраниците на селекторот Никола Велев одиграа сигурен натпревар и со заслужена победа направија важен прв чекор во борбата за висок пласман во групата „А“.
По рамноправната прва четвртина, која им припадна на Словаците со 17:15, македонските кошаркари го подигнаа нивото на игра во вториот период. Со цврста одбрана, брза транзиција и прецизен напад, Македонија направи пресврт и на полувремето замина со убедлива предност од 41:28.
Најрасположен во првите 20 минути беше Коста Ќириловски, кој ги постигна сите свои 15 поени и беше лидер на македонскиот состав.
Нашата репрезентација одлично го отвори и второто полувреме, правејќи серија од 10:0 за највисоки 51:28. Иако Словачка успеа постепено да ја намали негативата и на стартот од последната четвртина се доближи на само пет поени (57:52), Македонија не дозволи пресврт.
Во завршницата Амар Грбовиќ, Сергеј Младеновски и Атанасиј Трајанов погодија во вистински момент и повторно обезбедија двоцифрена предност, додека Марко Луканоски со важен кош на помалку од три минути до крајот практично ги реши сите дилеми околу победникот. До крајот, македонските кошаркари рутински ја зачуваа предноста и заслужено го запишаа првиот триумф на шампионатот.
Коста Ќириловски беше најефикасен во македонскиот тим со 15 поени. Марко Луканоски натпреварот го заврши со 11 поени и девет скока, додека Давид Петрушевски запиша 10 поени и пет скока.
Во вториот натпревар од групата „А“, Шведска убедливо го совлада Азербејџан со 85:58, додека Ирска беше слободна во првото коло.
Следниот предизвик за Македонија е денес , кога од 13:30 часот ќе се сретне со селекцијата на Ирска во рамките на второто коло.
