Дебитантот во Втора лига, Камјани продолжува со активностите околу формирањето на составот за историската сезона во Втората македонска фудбалска лига, а најново засилување за тимот е Бесарт Реџепи.
Младиот фудбалер во новата сезона ќе го носи бело-зелениот дрес, откако реши својот фудбалски пат да го продолжи во редовите на Камјани.
Реџепи потекнува од академијата на тетовска Шкендија, настапуваше и за Гостивар, Дрита, Борец, Воска Спорт и Арсими, а во редовите на Камјани носи и прволигашка искуство.
Од Камјани веруваат дека Реџепи со своите квалитети, посветеност и желба за напредок ќе биде значајно засилување за екипата во дебитантската сезона во второлигашкото друштво.
Камјани во сезоната 2026/27 ќе дебитира во Втората македонска фудбалска лига, а првиот предизвик ќе биде тежок – тимот ќе ја отвори сезоната со гостување во Битола против Пелистер, екипа која минатата сезона настапуваше во Првата лига.
Со новите засилувања и амбициозниот пристап, Камјани најавува дека ќе се обиде достојно да се претстави во новото натпреварување и да биде конкурентен во второлигашката конкуренција.
