Тиквеш го совлада Скопје со 1-0 во првиот натпревар од 13.коло во Првата фудбалска лига. Тимот од Кавадарци имаше многу шанси, но Кристијан Наумовски блескаше на голот на Скопје. Бодовите, сепак, му припаднаа на Тиквеш.
Тиквеш дојде во водство во 26.минута. По корнерот од десната страна, Ренатињо со волеј-удар ја затресе мрежата на Кристијан Наумовски.
Десет минути подоцна Лавал беше во шанса, но шутираше непрецизно од 12 метри. До крајот на првиот дел и Сила имаше можност, по додавањето од Лусианињо, но во последен момент расчисти одбраната на Скопје.
Тиквеш тргна офанзивно и во второто полувреме. Лусианињо во 51.минута, излезе сам пред Наумовски, го мина ј голманот, а потоа не успеа да ја погоди празната мрежа од изгледна позиција.
Потоа во шанси беа и Лавал и Висдом, но без ефект. Во 59.минута, Лусианињо повторно беше во одлична можност, шутираше од непосредна близина, но Наумовски спаси сигурен гол.
Три минути подоцна Лусианињо подготви одлична шанса за Лавал, но повторно Наумовски реагираше одлично.
По многу шанси, се чинеше дека Тиквеш ја удвои предноста во 69.минута, кога Окере Висдом успеа да го надмудри противничкиот голман. Сепак, беше досудена офсајд ситуација и голот не беше признат.
На крајот, Тиквеш ги освои трите бода, иако можеше да слави и многу поубедливо.
