Актуелниот македонски шампион МЗТ Скопје го започна формирањето на тимот за новата сезона со ангажманот на првото летно засилување. Нов член на „сино-белите“ е македонскиот репрезентативец Лука Стојановски, кој официјално го стави потписот на договорот со клубот.
За 26-годишниот бек-шутер ова е враќање во добро позната средина, откако претходно беше дел од МЗТ Скопје во сезоната 2018/19. Во продолжение на кариерата настапуваше за Академија ФМП, Еуро Никел, а последните три сезони ги помина во екипата на Пелистер.
Стојановски во изминатиот период се наметна како еден од позначајните македонски кошаркари, со статус на стандарден репрезентативец и играч кој е дел од новата генерација на лидери во националниот тим.
Со неговото пристигнување, МЗТ Скопје ја започнува изградбата на составот кој во новата сезона ќе има амбициозна задача на три фронта – ФИБА Еврокупот, АБА2 лигата и домашната Суперлига.
Од клубот најавуваат дека трансферот на Стојановски е само почеток и дека во следниот период ќе има нови новости поврзани со екипата за сезоната што следува.
