Нови предизвици, нови европски возбудувања и големо враќање на меѓународната сцена за македонскиот шампион МЗТ Скопје Аеродром. Клубот официјално потврди дека во сезоната 2026/27 повторно ќе биде дел од ФИБА Еврокупот, со што по пауза од две ипол децении се враќа во ова европско натпреварување.
Покрај настапите во АБА2 лигата и домашното првенство, „сино-белите“ ги очекува и европска авантура во која ќе се соочат со квалитетни противници од повеќе земји. Во групната фаза МЗТ Скопје ќе одигра најмалку 10 европски натпревари, а имињата на ривалите ќе бидат познати по ждрепката која ќе се одржи на 16 јули во Минхен.
Враќањето на европската сцена е уште една потврда за континуираниот развој на клубот и амбицијата МЗТ Скопје повторно да биде вистински амбасадор на македонската кошарка надвор од границите на државата.
Пред шампионот е долга и предизвикувачка сезона со голем број натпревари, силни противници и нови можности за докажување. Клубот од Аеродром останува фокусиран на својата цел – достоинствено претставување на македонскиот спорт, конкурентност на секој терен и продолжување на традицијата која со децении го прави МЗТ Скопје симбол на македонската кошарка.
Европа повторно доаѓа во „Јане Сандански“, а МЗТ Скопје подготвува ново поглавје во својата богата историја.
