Возбудувањата на меѓуопштинскиот турнир во мал фудбал „Ресен 2026“ продолжија и синоќа со натпреварите од четвртфиналната фаза, по кои беа познати четирите екипи кои ќе се борат за пласман во големото финале.
Во првиот четвртфинален натпревар, екипата на Пекара Александар славеше со 3:2 против БХС Груп и обезбеди место меѓу четирите најдобри.
Пласман во полуфиналето избори и Инекс Олгица, која во неизвесен натпревар минимално со 1:0 го совлада составот на Солар Билд.
Најголема драма беше видена на дуелот помеѓу Студио 13 и Сливница. По регуларните 40 минути резултатот беше 2:2, а по подоброто изведување на пенали со 4:2 славеше Студио 13.
Пенал рулетот го реши и последниот четвртфинален натпревар, во кој АСП ПАК по 0:0 во регуларниот тек со 3:2 на пенали ја елиминираше екипата на Викса Пром.
Вечерва на програмата се полуфиналните пресметки. Од 20:00 часот ќе играат Инекс Олгица и Пекара Александар, додека од 22:00 часот силите ќе ги одмерат Студио 13 и АСП ПАК.
Меѓу двата полуфинални натпревари, од 21:00 часот ќе се одигра и ревијален натпревар на ФК Преспа Младинци.
Спортска Мрежа, како и во изминатите години, е медиумски покровител на турнирот „Ресен 2026“, кој важи за еден од најдобро организираните турнири во мал фудбал во Македонија.
