Со многу возбудувања, голови, талентирани фудбалери и одлична атмосфера, успешно заврши првото издание на фудбалскиот турнир „Стоби Куп 2026“, кој се одржа во Општина Градско и собра голем број млади фудбалски надежи од повеќе клубови од Македонија.
Во текот на турнирот, младите фудбалери имаа можност да ги покажат своите квалитети, а љубителите на фудбалот да уживаат во голем број интересни и неизвесни натпревари. Организаторите успешно го реализираа првото издание на турнирот, кој уште од самиот старт покажа дека има потенцијал да прерасне во значаен младински спортски настан.
Кај генерацијата 2013, шампионскиот пехар заврши во рацете на ГФК Тиквеш, кој во финалниот поредок заврши пред ФК Фортуна, ФК Борец Јуниор и ГФК Неготино. Марков Трајче беше најдобар стрелец, Тарик Мамути го понесе признанието за најдобар играч, додека Филип Костовски беше прогласен за најдобар голман.
ГФК Тиквеш доминираше и кај генерацијата 2014, каде ја освои втората титула на турнирот. Зад кавадаречкиот состав се пласираа ГФК Неготино, ФК Форца и ФК Борец Јуниор. Илија Камчев беше најдобар стрелец, Марко Бојков најдобар играч, а Никола Симев најдобар голман.
Успешниот настап на Тиквеш продолжи и во генерацијата 2015, каде кавадаречкиот тим ја комплетираше вистинската „трипл круна“ освојувајќи и трета титула. ГФК Неготино заврши втор, ФК Форца трет, а ФК Борец Јуниор четврт. За најдобар стрелец беше избран Марко Копевски, додека Душко Силев и Алексеј Димов ги понесоа признанијата за најдобар играч и најдобар голман.
Во генерацијата 2016 дојде до промена на тронот. ГФК Неготино стигна до шампионската титула пред ГФК Тиквеш, ФК Борец Јуниор и ФК Форца. Хасан Усеинов беше најдобар стрелец, Влатко Темелковски најдобар играч, а Вук Стоиловиќ најдобар голман.
Неготино го повтори успехот и кај генерацијата 2018, каде повторно го освои првото место пред ГФК Тиквеш, ГФК Градско и ФК Росоман. Александар Ристевски беше најдобар стрелец, Дарко Милков најдобар играч, а Војдан Цветков најдобар голман на турнирот.
Едно од најпријатните изненадувања беше генерацијата 2017, каде шампионската титула ја освои ГФК Градско. Домаќините се искачија на највисокото место на пиедесталот пред ФК Фортуна, ГФК Тиквеш и ГФК Неготино. Андреј Митрев беше најдобар стрелец, Димитар Малинков најдобар играч, а Хадиќ Мамути најдобар голман.
Првото издание на Стоби Куп покажа дека младинскиот фудбал има светла иднина, а организацијата, квалитетот на натпреварите и големиот број учесници беа доказ дека Градско доби спортски настан кој може да стане традиционален и препознатлив во македонскиот фудбал.
Спортска Мрежа со гордост беше медиумски покровител на овој спортски настан и во изминатите денови ги следеше случувањата од турнирот, пренесувајќи ги резултатите, атмосферата и успесите на младите фудбалски надежи кои беа главните ѕвезди на Стоби Куп 2026.
