Најдобрите македонски одбојкари со пораз го отворија настапот во Европската лига 2026, откако во салата „Парк“ во Струмица загубија од Холандија со 0:3 (19:25, 21:25, 22:25). Гостите важеа за фаворити пред почетокот на натпреварот и ја оправдаа таа улога, иако избраниците на селекторот Јошко Миленкоски пружија силен отпор и во поголем дел од мечот беа рамноправен противник.
Македонија сигурно го отвори натпреварот и долго време играше поен за поен со Холанѓаните. Покрај искусните Никола и Ѓорѓи Ѓоргиев, добра партија прикажаа и средните блокери Филип Маџунков и Филип Савовски, либерото Ричлиев, како и Лука Костиќ, Стојан Илиев и Филип Јованов, кои донесоа дополнителна енергија во составот.
Првиот сет беше израмнет до резултатот 8:8, но серијата на Холандија од 0:3 им овозможи да создадат предност. Дополнителни проблеми за македонската селекција претставуваше играта на противничките средни блокери, па гостите стигнаа и до највисоки пет поени предност (12:17). По тајм-аутот на Миленкоски, Македонија заигра подобро, се доближи на 17:20, но немаше сили за целосен пресврт и сетот го загуби со 19:25.
Во вториот и третиот сет домашните одбојкари покажаа уште поголема борбеност. Македонија постојано беше во резултатска негатива, но успеваше да се враќа и да остане во игра. Селекторот Миленкоски ротираше повеќе играчи на примачката позиција, давајќи им шанса на сите расположливи одбојкари.
И покрај големата желба и борбеност, Македонија не успеа да стигне до сет против квалитетниот противник. Холандија ги доби и преостанатите два сета со 25:21 и 25:22 и стигна до максимална победа.
Капитенот Никола Ѓоргиев беше најефикасен во македонскиот состав со 11 освоени поени. Стојан Илиев додаде осум, Лука Костиќ и Филип Савовски реализираа по шест, додека Филип Маџунков натпреварот го заврши со пет поени.
Македонија веќе в недела ќе има нова можност за прва победа во Европската лига, кога во салата „Парк“ во Струмица ќе се соочи со Луксембург. Натпреварот започнува во 19 часот.
