Младинскиот фудбалски турнир „Охрид Куп 2026“ продолжува да привлекува големо внимание кај клубовите и фудбалските школи од регионот. Поради зголемениот интерес и веќе пријавените неколку екипи, организаторите донесоа одлука на турнирот официјално да биде вклучена и генерацијата 2014.
Така, покрај генерациите 2015, 2016, 2017, 2018 и 2019, на турнирот ќе настапуваат и екипи родени во 2014 година, кои ќе играат во формат 8 + 1.
Од организацијата истакнуваат дека интересот за „Охрид Куп 2026“ од ден на ден расте, а пријавувањето е во полн ек. Токму барањата од повеќе клубови и академии биле главната причина да се прошири програмата и да им се овозможи учество и на генерациите 2014.
„Нашата цел е што повеќе деца да бидат дел од оваа спортска приказна. Среќни сме што интересот е голем и што клубовите препознаваат дека „Охрид Куп“ нуди нешто поразлично – турнир каде децата се во прв план“, велат организаторите.
Турнирот ќе се одржи од 18 до 21 јуни во Охрид, на терените на СРЦ „Билјанини Извори“, а покрај натпреварите, учесниците ќе добијат и бројни поволности.
Секое дете ќе добие медал и официјална маичка, додека секоја екипа ќе има бесплатна медиумска поддршка од Спортска Мрежа, преку интервјуа, видео моменти и промоција на клубовите и младите таленти за цела 2026 година. Дополнително, за тренерот се обезбедени тренерки.
„Охрид Куп 2026“ продолжува да ја гради својата препознатлива порака – секое дете е победник.
