Еурофарм Пелистер продолжува со засилувањата за новата сезона, а најново име во битолскиот тим е перспективниот словенечки ракометар Малик Татар.
Станува збор за 20-годишен лев бек, кој со своите квалитети веќе го привлече вниманието на повеќе европски клубови, а битолчани успеаја да го обезбедат неговиот потпис. Татар важи за еден од најталентираните млади словенечки ракометари и играч со сериозна проекција за голема кариера.
Новиот ракометар на „зелено-белите“ е роден во Целје, а својата афирмација ја стекна во редовите на Горење Велење. Зад себе има настапи и за сите младински селекции на словенечката репрезентација, што дополнително говори за неговиот потенцијал и квалитет.
Татар потпиша двегодишен договор со Еурофарм Пелистер и официјално ќе биде претставен на стартот од подготовките за сезоната 2025/26.
Со овој трансфер, младиот Словенец стана петто засилување за тимот предводен од Лино Червар, по ангажманите на Котар, Серафимов, Белистојаноски и Џелиловиќ.
Битолчани очигледно сериозно го подготвуваат ростерот за новите домашни и европски предизвици, а доаѓањето на Малик Татар претставува инвестиција и за сегашноста и за иднината на клубот.
