Брегалница повторно е прволигаш! Штипските „сини“ денеска со победата над Победа официјално ја заверија шампионската титула во Втората македонска фудбалска лига и од следната сезона ќе настапуваат во елитното друштво.
По последниот судиски свиреж во Штип следуваше големо славје, а капитенот на Брегалница, Стефан Коцев го подигна шампионскиот пехар за освоеното прво место во второлигашката конкуренција.
Ова е уште еден огромен успех за искусниот стратег Влатко Костов, кој по вторпат успеа да ја внесе Брегалница од Втора во Прва лига, а вкупно по шести пат во својата тренерска кариера обезбедува прволигашка промоција.
Костов со години важи за еден од најуспешните македонски тренери кога станува збор за враќање клубови во елитата, а претходно ваков успех оствари со Хоризонт Турново, Куманово, Осогово, Пелистер и Брегалница.
Покрај бројните успеси во Втората лига, зад себе има и шампионска титула во Првата македонска фудбалска лига со Ренова во сезоната 2009/2010, како и трофеј во Купот на Македонија две години подоцна.
Штип повторно ќе гледа прволигашки фудбал, а големи заслуги за тоа има токму Влатко Костов, кој уште еднаш потврди дека е специјалист за создавање шампионски тимови и враќање клубови во македонската фудбалска елита.
