Фудбалерите на Силекс во финалето од Купот на Македонија ја совладаа Шкендија со 1:0 и по четврти пат во клупската историја триумфираше во ова натпреварување.
Шефот на стручниот штаб на тимот од Кратово, Александар Васоски, по финалниот меч направи подетална анализа за натпреварот на Силекс, за тактиката и филозофијата на самиот терен.
„Според очекувањата, вечерашниот натпревар беше тежок. Шкендија можеби беше подобар противник во поле, но тоа беше дел од тактиката. Не може секој натпревар особено на ваков важен меч да се игра атрактивно. Одигравме како што се договоривме. Свесно го префрливме Додев на левата страна, да направи вишок и успеавме во тоа, дадовме гол на време и сметам заслужено го освоивме Купот. Им честитам на момците, ако минатата за малку ни избега трофејот во шампионатот, оваа година го земавме Купот што е голем успех за нас“, изјави Васоски.
„Ова не беше најдобар натпревар на Силекс сезонава, но првично се договоривме да ги затвориме сите приод и после 60-та минута да удриме со силно оружје. Затоа можеби Мирчевски остана на клупата, но токму во тие мигови кога се одлучуваше мечот поентиравме“, додаде Васоски.
