По големата победа на РК Еурофарм Пелистер на гостувањето кај ГРК Охрид, во изјава за Спортска Мрежа, голманот Никола Митревски, не го криеше задоволството од изданието на својот тим. Искусниот чувар на мрежата и македонски репрезентативец, беше еден од најзаслужните за триумфот, запишувајќи дури 16 интервенции во едно од клучните соочувања сезонава.
Митревски истакна дека дуелот бил исклучително тежок, особено поради заморот од репрезентативните обврски и краткото време за подготовка. Сепак, според него, и покрај тоа што тимот немал ниту еден комплетен тренинг, пелистерци одиграле на високо ниво против квалитетен противник каков што е Охрид.
„Навистина тежок натпревар, и тоа после само три дена од квалификацискиот натпревар со Словачка. Имавме доста репрезентативци во нашиот тим, немавме ниту еден целосен тренинг, но за среќа тоа воопшто не се виде на теренот – одигравме феноменално против еден противник како екипата на Охрид, којашто игра финале на едно европско натпреварување.“
Голманот на битолчани зборуваше и за атмосферата во салата, нагласувајќи дека натпреварот имал вистински дерби амбиент. Воедно порача дека иако победата е огромен чекор кон второто место, работата сè уште не е завршена и тимот мора максимално фокусирано да влезе во последното коло од плеј-офот.
„Одлична атмосфера, право дерби, полна сала, честитки заслужуваат сите присутни во салата, кои даваа поддршка на својот тим. Сега ни преостанува уште еден натпревар во последното коло од плеј-офот, победа таму ни носи второ место..но ништо не е завршено, има уште за играње.“- изјави Митревски за Спортска Мрежа.
РК Еурофарм Пелистер во последното коло ќе има шанса пред својата публика да го потврди второто место на табелата и да обезбеди пласман на европската сцена следната сезона.
