ГРК Охрид продолжува со засилувањата за новата сезона, а петто ново име во „сино-белиот“ табор е францускиот ракометар Адама Кеита.
Искусното лево крило потпиша договор со охридскиот клуб за сезоната 2026/2027, со можност за продолжување и за 2027/2028. Кеита има 28 години, висок е 186 сантиметри и во Охрид ќе го носи дресот со број 9.
Французинот во Охрид доаѓа од грчки АЕК, а претходно дури осум сезони беше дел од ракометниот гигант ПСЖ, со кој освои бројни титули на домашната и меѓународната сцена.
Кеита има и богато репрезентативно искуство во младинските селекции на Франција, а во 2017 година освои бронзен медал на Светското јуниорско првенство.
По потписот за ГРК Охрид, францускиот интернационалец не го криеше задоволството од новиот предизвик.
„Започнува ново поглавје за мене. Горд сум што му се приклучувам на ГРК Охрид и што ја започнувам оваа нова авантура во Македонија. Му благодарам на клубот за довербата што ми ја укажа. Доаѓам со голема желба, амбиција и волја да го дадам максимумот на теренот за боите на клубот. Со нетрпение очекувам да започнам и да се запознаам со нашите навивачи“, изјави Адама Кеита.
Со ангажманот на Кеита, ГРК Охрид испраќа јасна порака дека амбициите на клубот за следната сезона ќе бидат уште поголеми.
