Три второлигашки екипи ќе мора да одиграат натпревари со карактер на финале за да ја спасат сезоната и да обезбедат опстанок во Втората македонска фудбалска лига.
Каменица Саса и Кожуф, кои изминатите сезони беа стабилни второлигаши, преку бараж ќе мора да бараат спас и опстанок во второлигашкото друштво.
Кожуф до последно се бореше за директен опстанок, но надежите на тимот од Гевгелија беа урнати пред две кола, кога стана јасно дека Иван Варадиновски и неговите избраници ќе мора преку бараж да се спасуваат од испаѓање.
„Рударите“ од Македонска Каменица претходно ги загубија шансите за директен опстанок, па и тие преку бараж ќе се обидат да обезбедат нова второлигашка сезона.
Тетекс, кој минатата сезона стана шампион во Третата лига – Запад и експресно се врати во Втората лига, исто така ќе мора преку бараж да ја спасува сезоната. За „штофарите“, овие натпревари ќе бидат вистински мечеви на сезоната.
Во баражот за пласман во Втората лига веќе се пласирани Еуромилк ГЛ како шампион на Север, Камјани како шампион на Запад, Влазними како шампион на Југозапад и Борец како шампион на Југ.
Се уште не е познат шампионот на Третата лига – Исток, каде голема битка водат лидерот Победа Валандово и второпласираното Овче Поле. На две кола до крајот, разликата меѓу двата тима е само еден бод.
