Јавното претпријатие ЈП „Билјанини Извори“ спроведува интензивни пролетни активности за подобрување на тревната подлога на стадионот „Билјанини Извори“, со цел создавање врвни услови за спорт и рекреација. Покрај главниот стадион опфатени се активности и на останатите фудбалски терени.
Со доаѓањето на пролетта, започнаа темелни подготовки на тревнатите површини, при што беше извршена механичка обработка и длабинско проветрување на почвата на повеќе од 20 сантиметри. Овој процес овозможува подобра аерација и природна размена на гасови, што е клучно за здрав раст на тревата.
Потоа следуваше пресејување со квалитетна тревна смеса, како и прихрана со комплексно гранулирано ѓубриво. Дополнително, беше извршен и фолијарен третман со современи стимулатори за раст, PH стабилизатори и биолошки препарати базирани на Ecklonia maxima и Bacillus subtilis.
Целта на овие активности е јасна – создавање здрав, густ и отпорен тревник со силен коренов систем, кој ќе биде подготвен да ги издржи летните услови и зголемената експлоатација.
Во финалната фаза е спроведен и процес на топ-дресинг (песочење), со што дополнително се подобрува структурата на површината и се обезбедува оптимален контакт на семето со почвата.
Од ЈП „Билјанини Извори“ потенцираат дека ќе продолжат со посветени инвестиции во унапредување на спортските и рекреативните површини, со што директно се придонесува за подобри услови за сите спортисти и граѓани во Охрид.
