Утре ќе бидат одиграни полуфиналните реванши од Купот на Македонија, а фокусот ќе биде во Кратово каде има активен резултат. Прволигашот Силекс ќе го пречека второлигашот Охрид, првото соочување меѓу двете екипи на „Билјанини Извори“ заврши без победник (1:1), а сега „кратерите“ не смеат да си дозволат „луксуз“ на домашен терен и ќе мора да дојдат до позитивен резултат против „рибарите“.
Од друга страна, Охрид веќе ги загуби шансите за да биде шампион во Втора лига и да има директен влез во Прва лига, па ќе чека од сенка место за бараж и по потешкиот пат да го бара влезот во елитата.
Затоа, Охрид може да влезе на утрешниот меч во Кратово максимално фокусиран и да бара историја, а како одигра на првиот меч и му дава за право тимот на Ромео Кочоски да се надева на историско Куп финале. Шкендија Арачиново како домаќин на реваншот со тетовска Шкендија ќе игра во Куманово на стадионот на Башкими, а причината е ВАР технологијата.
На првиот меч тимот од Арачиново беше добар, но загуби со 3:2, а така тимот од Тетово одново како фаворит доаѓа во Куманово по позитивен резултат и со тоа билет за пласман во финалето. Двата натпреварите стартуваат во 16 часот, а победниците од истите ќе се соочат во големото финале.
Освојувачот на Купот на Македонија обезбедува излез во Европа, односно игра квалификации за Конференциска лига на УЕФА.
