Општинскиот фудбалски сојуз Гази Баба реализираше значаен инфраструктурен проект со кој се унапредуваат условите за работа и развој на фудбалот во повеќе општини. Со заеднички сили и координација, извршена е санација и уредување на вкупно шест фудбалски терени.
Со овие активности опфатени се стадионот „Железарница“ во Автокоманда, стадионот во Синѓелиќ, како и фудбалските терени во Ржаничино, Петровец, Средно Коњари и Долно Коњари.
На сите терени се спроведени темелни и професионални зафати, кои вклучуваат косење и уредување на тревната површина, аерација за подобра дренажа и проток на кислород, порамнување со песок за рамна подлога, прихрана со висококвалитетно ѓубре и засадување нова трева со цел да се добие густ и издржлив терен.
Овој проект претставува резултат на заедничка работа меѓу институциите и фудбалските структури, со јасна цел – создавање квалитетни услови за тренинг и натпреварување, како за клубовите, така и за младите фудбалски таленти.
„Општинскиот фудбалски сојуз Гази Баба изразува огромна благодарност до претседателот на Фудбалската Федерација на Македонија, Масар Омерагиќ, како и до градоначалниците Бобан Стефковски (Општина Гази Баба), Александар Георгиевски – Градоначалник на Општина Илинден и Борче Митевски (Општина Петровец). Овој голем проект е плод на исклучителна меѓусебна соработка и заедничка координација, со единствена цел – создавање врвни услови за фудбал во нашите општини“, рече претседателот на ОФС Гази Баба, Дарко Костовски.
Во изминатиот период е саниран поголем дел од терените под надлежност на ОФС Гази Баба, а во наредниот период се најавува продолжување на активностите со целосно уредување и на преостанатите фудбалски површини.
Од Сојузот потенцираат дека ваквите проекти се доказ дека со заедничка работа и визија може да се постигнат конкретни резултати, кои директно придонесуваат за развојот на фудбалот на локално ниво.
