Некогашниот второлигаш Братство од Житоше ја круниса фантастичната сезона освојувајќи ја шампионската титула во Б Квалитетната лига на Општинската фудбалска лига Прилеп, која претставува петти ранг на натпреварување. Со овој успех, тимот обезбеди пласман во А Квалитетната лига, каде ќе настапува од следната сезона.
Братство зад себе остави импресивна сезона исполнета со резултати и доминација на теренот. Тимот забележа 11 победи, едно реми и два порази, со гол-разлика од 43 постигнати и 17 примени погодоци, освојувајќи вкупно 34 бодови.
Овој успех е резултат на организирана игра, стабилен ростер и јасна визија, а признание за сработеното стигна и од клупата, каде што тренерот Музафер Алиу ја предводеше екипата до шампионскиот пехар.
„Некогаш како фудбалер и капитен на оваа екипа, а денес со гордост ја славам шампионската титула во ОФС Прилеп како тренер на мојот клуб кој ми е во срцето. Овој успех им припаѓа на сите. Упатувам огромна благодарност до стручниот штаб и фудбалерите кои веруваа во мојата визија; заедно успеавме да испишеме нова историја за нашиот клуб. Посебна благодарност до нашата прекрасна публика, која нè бодреше неуморно во текот на целата сезона, како дома, така и на секое гостување. Да се биде тренер на овој клуб е огромна привилегија. Горд сум што ги следам стапките на луѓето кои го издигнаа овој клуб со незаборавна историја, како г-дин Ромер Муриќ и тогашното раководство, кои го постигнаа историскиот успех во плеј-офот за пласман во Втората лига на Македонија. Продолжуваме понатаму кон нови предизвици“, вели Музафер Алиу, тренер на ФК Братство од Житоше.
Со ваква сезона зад себе, Братство од Житоше со оптимизам и амбиции ќе влезе во новиот предизвик – настапот во А Квалитетната лига, каде ќе се обиде да го продолжи победничкиот ритам и да испише нови успеси.
